Balbordo

Vento Lois no Auga da Laxe

2011-11-12T08:59:00.002Z

Cando nos achegamos ao remate do Ano Lois dedicado ao poeta Lois Pereiro, o EDL Balbordo quere convidarvos a un acto de peche no que alumnado do centro recitará poemas de Lois, asistiremos á estrea da vídeo-creación realizada pola alumna Rebeca Tizón Rey, de 2º de Bacharelato a partir de poemas do libro Poesía de amor e enfermidade e gozaremos co Acústico Lois do marabilloso e inclasificable cantautor punk Leo i Arremecághona. Avisámosvos con tempo para que non o perdades. Anotade na vosa axenda: será o venres 16 de decembro contra as 20.30h no Salón de Actos do instituto(coñecido tamén como Ghar Rock Café Augha da Laxe). A entrada é de balde. Convidade os vosos amigos. Vémonos no Ghar Rock!

A Lingua sabe a pan

2011-11-08T22:26:00.006Z

Marabilloso lipdub realizado polo colexio Virxe da Saleta de Cea coa música de Sweet home Alabama versionada despois como Miña terra galega por Siniestro Total. Parabéns!

A Lingua sabe a Pan from cpivirxedasaleta on Vimeo.

PILING ao teatro

2011-11-07T22:41:00.004Z

Si, o próximo venres 18 de novembro imos facer un piling teatral. Será en Tui ás 21.30horas e asistiremos á obra Pelos na lingua, de Talía Teatro. Se estades interesados en asistir, tedes que apuntarvos antes do venres 11 de novembro para poder reservar as entradas. Este é o cartel que anuncia a obra. Animádevos!

Reunión do EDL Balbordo

2011-11-07T22:30:00.002Z

Este mércores 9 de novembro no recreo teremos a reunión de constitución do EDL Balbordo para o curso 2011-2012. Estades convidados. Temos unha morea de actividades agardando por vós. Aquí vos deixamos a fotografía dun cartel que deseñamos para o equipo.

E máis parellas lingüísticas...

2011-06-06T17:02:00.007Z

E outro vídeo máis.

2011-06-03T06:48:00.004Z

Trátase do que fixemos co gallo da visita das compañeiras e compañeiros do EDL do IES Félix Muriel de Rianxo.

Ollo que este si que pesa (arredor dos 600 MB). Para baixalo preme aquí, colle un libriño e le unhas páxinas até que se complete.

Tamén aproveita para instalar o VLC Player.

IN coa nosa lINgua

2011-06-03T06:26:00.005Z

Velaquí queda o vídeo feito para na campaña IN coa nosa lINgua.

Se tes unha conexión á rede de pouca velocidade non desesperes: o vídeo é curtiño en tempo pero pesa uns 180 MB e paga a pena agardar por el.

Preme aquí para baixalo .

Se queres, instala o reprodutor VLC Player (o que le calquera formato de vídeo).

Novas parellas lingüísticas

2011-05-24T18:48:00.006Z

Dani e Xiana

Katya e Marta

Rebeca e Marta

Aquí tedes as fotos de 3 novas parellas lingüísticas formadas por alumnado de bacharelato. Nos próximos días teremos tamén dúas novas parellas de nais, pais e profes.

Obradoiro de bolsos, mochilas e fundas

2011-05-23T19:12:00.008Z

Deixámosvos aquí unhas cantas fotos do marabilloso resultado das fundas de libros, dos bolsos e das mochilas que o alumnado do EDL e o de plástica de 4º e 1º bach. elaborou coa axuda e as explicacións de María Almazán, deseñadora que acaba de inaugurar non hai moito en Gondomar unha tenda de roupa feita con tecidos ecolóxicos e de reciclaxe. Grazas, María!

Acto de entrega dos premios do Concurso de Haikus do Val Miñor

2011-05-22T16:21:00.007Z

Sabela Vilar e Enrique Crespo, de 4º ESO, con dúas mencións honoríficas, e Elena Crespo, tamén de 4º ESO, cun 3º premio, foron recoñecidos polos poemarios presentados á segunda edición do Concurso de Haikus do Val Miñor que organizan conxuntamente os ENDL e os departamentos de Lingua Galega dos centros de secundaria. Parabéns! Velaquí unhas fotos dos gañadores do Val e do instituto. Nos próximos días publicaremos tamén os seus poemarios.

Compromisos IN

2011-05-21T19:31:00.001Z

Até o 1 de xuño hai de prazo para que a comunidade escolar Auga da Laxe faga o seu compromiso IN coa lingua. A maneira de facelo é ben doada: asinades un contrato co coordinador do EDL deixando por escrito o pequeno gran de area que cada un e cada unha de vós estades dispostos a poñer para que a situación da lingua mellore ao voso arredor. Ademais, por participar, entraredes nun gran sorteo de camisetas no recreo do día 1 de xuño. Animádevos!

Elaboración do informe para o Proxecto Ríos

2011-05-19T19:46:00.000Z

Despois da saída efectuada o pasado 7 de abril e na que se fixo unha limpeza e análise do treito do río Miñor que vai desde a Ponte do Matadeiro até a Ponte das Ánimas, quedaba por elaborar o informe que nos vindeiros días se enviará aos encargados do Proxecto Ríos. Para redactar o devandito informe reuniuse unha pequena comisión que estaba composta por Pura (bióloga), Anxo (coordinador do EDL Balbordo) e Martín Pintos e Gabriela Legaspi (alumnos). Velaquí unha foto que deixa constancia do feito.

Primeira parella lingüística do Voluntariado Auga da Laxe pola Lingua

2011-05-16T19:16:00.004Z

Rosana, nai dunha alumna de 4º de ESO, e Ramona, nai dunha alumna de 1º de bacharelato, son a primeira parella lingüística que se formou para levar a cabo o proxecto Voluntariado Auga da Laxe pola Lingua. Esta actividade consiste en xuntar unha persoa que fale o galego habitualmente con outra que quere mellorar o seu dominio porque habitualmente non o emprega. Rosana e Ramona terán que concertar tres citas de aquí a final de curso para, dunha maneira relaxada e tranquila, falar en galego. Paseos, cafés, visitas a exposicións son algunhas das posibilidades entre as que poden escoller. Cando remate o curso xa nos contarán que tal foi a experiencia. De momento, dámoslles as grazas por dar o paso e desexámoslles uns felices encontros lingüísticos.

IN coa nosa LINGUA

2011-05-15T19:29:00.000Z

O pasado venres 13 de maio presentamos no instituto unha nova campaña para animar ao uso da Lingua. O lema escollido é "IN coa nosa LINGUA". Con ela pretendemos chamar a atención sobre a necesidade de poñer de moda, de crear tendencia co galego. Hai que conseguir que esteamos IN en galego. Como apoio a esta proposta o alumnado do EDL Balbordo gravou un anuncio e deseñou unhas chapas coas que agasallaron ao resto da comunidade escolar. A primeiros de xuño haberá un sorteo para regalar algunhas camisetas a aqueles e aquelas que nos vindeiros días asinen algún compromiso realista co galego.

20 anos dos ENDL

2011-05-14T19:41:00.002Z

Hai 20 anos que se iniciou a andadura dos ENDL. Para celebrar tan destacada efeméride o EDL Balbordo preparou unha pequena exposición destes 20 anos no instituto. Moitas actividades e tamén moitas dificultades pero o desexo firme de loitar por poñer o galego no lugar onde ten que estar. Mil primaveras máis para o galego!

Visita do EDL de Rianxo

2011-05-07T18:25:00.005Z

O pasado martes 3 de maio visitounos o EDL do IES Félix Muriel de Rianxo dentro da xornada de intercambio lingüístico que organizamos conxuntamente e que tivo o seu primeiro acto a finais de marzo en Rianxo. Despois dunha benvida no insti de Gondomar, desprazámonos a Baiona para comezar un paseo pola costa desde o Parador até Praia América en Nigrán. Como o tempo acompañou, puidemos xantar na praia, bañarnos, xogar e, sobre todo, compartir xuntos moitas cousas. Velaquí algunhas fotos do encontro (algunhas delas preciosas, por certo).

Proxecto Ríos co EDL Balbordo

2011-04-07T16:18:00.011Z

Hoxe estivemos colaborando co Proxecto Ríos de control de diferentes tramos dos ríos galegos. O EDL Balbordo, en concreto, encargouse dun tramo de 500 metros do río Miñor ao seu paso por Gondomar entre a Ponte da Paradela e o Ponte das Ánimas. Foi unha xornada moi interesante pois, ademais de facer unha serie de controis sobre o estado das augas(nitritos, ph, osíxeno, temperatura), valor patrimonial do tramo, especies de flora e fauna, etc, aproveitamos a visita para facer unha pequena limpeza do tramo. Foi realmente sorprendente todo o que alí atopamos: varias rodas, ventás, táboas, ferros varios, unha tarteira, un teléfono inalámbrico, un pivote dos que impiden aparcar na beirarrúa,... En fin, unha verdadeira pena. En calquera caso, a nós serviunos para sensibilizarnos no coidado do noso entorno máis próximo. Aproveitamos tamén o encontro para xantar todos xuntos e gravar un anuncio para unha campaña da que vos daremos conta moi pronto... Velaquí algunhas fotos dos e das intrépidas que limparon o río, dos analistas de augas,... Por certo, moitas grazas desde aquí a Pura, bióloga, que nos axudou e nos explicou como tiñamos que facer.

Intercambio con Rianxo

2011-03-30T15:49:00.000Z

Velaquí unhas cantas fotos que deixan constancia do marabilloso día de encontro co EDL do IES Félix Muriel de Rianxo. Chover, choveu moito pero as nosas ganas de intercambiar, coñecer outros lugares fermosos como as Dunas de Corrubedo e, sobre todo, compartir experiencias con outros rapaces e rapazas fixeron a xornada inesquecible. Agardamos con impaciencia o 3 de maio, día no que Rianxo virá coñecer as terras do Val Miñor. Até entón, aquí queda esta mostra

Reunión do Equipo Balbordo 2010-11

2010-10-07T17:50:00.004Z

O próximo xoves 14 de outubro, contra as doce, na aula de galego 1, haberá unha reunión de constitución do Equipo Balbordo para este curso. Se estás interesado/a en saber cales van ser as liñas de traballo e queres ser parte activa da tarefa de dinamizar a nosa lingua, agardámoste cos brazos abertos. E coa foto unha pequena pista dun lugar que imos coñecer (e a algúns dos rapaces e rapazas que alí viven): ondiñas veñen, ondiñas veñen, ondiñas veñen e van...Xa sabes de onde estamos a falar?

E máis zapatillas(2)

2010-06-16T21:03:00.003Z

Máis de 50 pares de zapatillas de deseño exclusivo en galego están penduradas nas paredes e columnas do noso instituto. Velaquí unha mostra antes da votación para decidir as zapatillas gañadoras.

Gústanme as flores do toxo

2010-06-13T16:10:00.005Z

Gústanme todas as flores do toxo. Por exemplo, estas de Lalo, de 4º ESO A, en forma de zapatilla.

As noites de verán de Lusca

2010-06-13T16:04:00.002Z

Lusca é o pseudónimo co que se presentou ao concurso a última finalista, Antía, tamén de 3º ESO A. Parabéns!

Título: Noites de verán
Pseudónimo: Lusca
Identidade: Antía González García

Reflectida na
lúa a túa cara.
Noites de verán.

Ao son dos grilos,
cos ollos nas estrelas.
Noites de verán.

Gozar lendo,
no meu xardín sen teito.
Noites de verán.

Soan os Beatles,
a pedra segue quente.
Noites de verán.

Seica non sabes?
Que ben se está sen frío.
Noites de verán.

Desexos contemporáneos de Vivaldi

2010-06-13T15:58:00.002Z

Penúltimo poemario finalista. O autor é Brais, de 3º ESO A. Velaquí o texto e unha foto do poeta.

Título: Desexos contemporáneos de Vivaldi
Pseudónimo: Anónimo
Identidade: Brais Araújo Otero

Ondas do mar
Barquiños a navegar
Calor de verán

Flores e pole
Insectos a voar
Cor primaveral

Frío e neve
Animais a invernar
Rúas baleiras

Camión, árbore…
Haiku mal deseñado
Faltan ideas

Follas que caen
Ledicia, colorido
Uns mesiños máis

A mirada dun humano

2010-06-10T00:24:00.000Z

Este é o título do poemario de Jose Ramón Fernández, de 3º ESO. A foto supoño que xa vos soa e José Ramón non está difícil de atopar.

Título: A mirada dun humano
Pseudónimo: Jota
Identidade: José Ramón Rodríguez

Un raio de luz.
Unha rosa desfeita.
Un desacougo.

O bosque seco,
os animais mortos.
Moito medo vai.

No calafrío
encóntrase a paixón.
Ganas de vivir.

Morre de fame.
O mundo non o mira.
Hipocrisía.

Unha aparición
é mesturada co ser.
Namoramento.

Noite de verán

2010-06-09T00:21:00.000Z

Aquí tedes a Noite de verán de Alicia. A foto é do día que Leo apareceu por sorpresa na súa clase.

Título: Noite de verán
Pseudónimo: Miss Lunatic
Nome: Alicia Grandío Arbiol, de 3º PDC

Vento de primavera.
Tarde de solpor.
Enchen o meu corazón.

Na cereixeira
Remuíño de vento.
Tempo colexial.

Chuvias de inverno.
Gotas de auga batendo.
Melancolía.

Esta música
Que corre polas veas
É a miña vida.

Nenos pequenos,
Tardes de verán e cor,
Risas e amores.

A noite é a vida nocturna
Da xuventude, diversión,
Fumar e pasalo ben,
Nada máis beber.

A posta do sol
No mar métese e
O amencer da noite aparece.

Ama en secreto,
Chora en silencio,
Que o amor dun día non dura moito tempo.

Na cascada sentes
Caer a auga como
Auga dos teus ollos entre
Os meus pensamentos.

O dragón escuro

2010-06-09T00:10:00.000Z

O dragón escuro presentou dous poemarios ao 1º Concurso de Haikus do Val Miñor. O segundo deles quedou finalista. Velaquí o tedes. E tamén unha foto do dragón.

Título: II
Pseudónimo: Dragón escuro
Nome: Matías Nicolás Gómez Díaz-4º ESO B

1º
El pensa na paz
está engaiolado
dinlle Mandela

2º
Hitler observa
o demo visitouno
debe pagarlle

3º
A nai chorando
o seu fillo non está
dorme na guerra

4º
Que fermosura
ela é o meu mundo
sempre a amei

5º
Os sen corazón
xente sen sentimentos
incomprendidos

6º
Neno que chora
pobre pai que non dorme
pero quéreno

A miña vila

2010-06-08T14:02:00.003Z

Aquí vos ofrecemos un fermoso poemario de Marta Fernández Carneiro, de 4º ESO B. Acompañámolo dunha foto da poeta.

Título: A miña vila
Pseudónimo: A veiga do liño
Nome: Marta Fernández Carneiro

A vida segue
os paxaros chirlan
corre a auga.

Veiga do liño
venderon as Cubanas
que mala venda!

Rasca que rasca
ó can pícanlle as pulgas
move a pata.

Moven os marcos
sácanse as machadas:
morte na vila.

Óese o vento
o liño estrágase
que imos facer?

Máis zapatillas

2010-06-08T00:08:00.000Z

Aquí vai outra entrega dos modelos exclusivos Auga da Laxe 2010.

Gothic Haikuray

2010-06-07T19:48:00.000Z

Este é o curioso pseudónimo co que se presentou ao concurso de haikus Daniel Diego Suárez, de 4º ESO A. Velaquí o seu estupendo poemario e unha foto.

Título: Poemas con amor
Pseudónimo: Gothic Haikuray
Nome: Daniel Diego Suárez

I
A primavera,
namorada sempre
do seu verán.

II
Son tres irmáns,
suxeitos polas mans,
traendo rosas.

III
A carón túa,
síntome xuvenil,
querida lúa.

IV
Dúas palabras,
que significan todo,
quérote, amor.

V
Os raios de sol,
e os teus cabelos,
rías de ouro.

Cartas sen fin

2010-06-07T00:20:00.000Z

Outro dos finalistas do concurso de haikus(e van tres). Vai tamén unha foto do finalista(o do medio con camiseta branca) á entrada do auditorio de Gondomar un pouco antes de coñecerse os resultados do concurso.

Título: Cartas sen fin
Pseudónimo: Rudess
Nome: Gonzalo Rodríguez Alonso 4º ESO B

O Solpor:
Vermellas nubes
Que cando a lúa chega
O sol afoga.

Queridos fascistas:
Santa Compaña
De rifles e inxustizas
Paseo da morte.

As casas baleiras:
Ti pecha os ollos
Mira as persianas baixas
El morre ó frío.

Ós capitalistas:
Comprádeo todo
Ata que o pobo esperte
Sangue e moedas.

Simplemente E.V.:
A carón de ti
Que fortes son os soños
Que forxa o amor.

O marabilloso haiku de Basi

2010-06-06T19:31:00.007Z

Así, como na foto, debía estar Basi no momento no que as fadas da inspiración lle axudaron a escribir este fermosísimo poema de tres versos que recibiu unha mención especial como un dos mellores haikus individuais. Velaquí a foto e o haiku.

As follas das árbores

caen mortas polos

disparos do outono

Basilio Pazos 3ºESO PDC

Cousiñas

2010-06-06T17:32:00.003Z

Aquí tedes o segundo dos textos finalistas do concurso de haikus. Deixámosvos tamén unha foto de Elena(é a terceira empezando pola dereita) con amigos e amigas no pasado p.i.lin.g. en Cíes.

Título: Cousiñas
Pseudónimo: Silvia Pérez
Nome: Elena Crespo Fernández 3ºESO B

As nubes vanse
e o ceo queda só
esperándoas.

Os paxariños
din que falan cantando
pero é chorando.

Terra mollada
vento xeado na casa
morriña e pena.

Pasa o tempo
cae a folla vermella
virá outra nova.

Negra, vermella
maruxiña pequena
gran voadora.

Por ti

2010-06-06T16:41:00.007Z

Por ti
Por ti, trocou miña vida por ti
todo é distinto dende que estás aquí
casi lembro a primeira vez que te vin
e é curioso que co tempo confiaras en min
Agora formas parte de min
é molesto se me esquezo cando te coñecín
agora somos por fin inseparabeis e sin ti
non sabería vivir, ti dime como vivir
Sen poderme expresar, ti me ensinache a cantar
o son do teu alalar, ti me ensinaches o mar
e aprendín a rimar,
e aprendín a crear, e aprendín a amar
Quixo o destino xogar
e eu deixeime levar
e quen o ía dicir que eu mesma ía contar
a miña vida en papel, agora podo soñar
Nunca aborrezo de ti
e adoezo eu si me separo de ti
gústame ouvir o teu son, podo sentir cada ton
quero crear a ilusión de que ti estás ao carón, de min
cada suspiro é unha inspiración
e é o teu latexar que segue o beat da canción
co tempo te coñecín, agora estamos aquí
ti formas parte de min, eu formo parte de ti
Ven aquí e faime soñar
que en soños podo voar, está a maxia no ar
e as notas poden soar, e o vento pode zoar
no soño eu podo contarte o que adoito calar e
Non sei o que será de ti,
pero eiquí te terei, siga ou non xunto a ti
eu vivo con ilusión descoñecendo o confín
e escribo esta canción por si te esqueces de min
AID Cantante de rap

Este é o texto e canción de rap que a cantante Aíd aportou para a campaña Orgullosos do galego que promove a Coordinadora de Equipos de Normalización e Dinamización Lingüística de Galicia da que este centro forma parte. Rosa Aneiros, Carlos Negro, Marilar Aleixandre, Jorge Mira, Paula Carballeira ou Kiko Dasilva tamén quixeron poñer o seu gran de area con debuxos e textos todos fermosísimos. Se queres acceder a algúns dos textos ou escoitar a canción, preme aquí. Por certo, preparádevos para unha sorpresa de final de curso porque Aíd estará no instituto nos últimos días de curso para facer un obradoiro de hip hop.

As primeiras zapatillas

2010-06-04T14:19:00.006Z

Si, xa están aquí as exclusivas, únicas e fermosísimas zapatillas con deseño galego. Acaban de saír ao mercado os primeiros modelos. Velaquí as primeiras fotos. A que están chulas?

A visita de Leo

2010-06-02T14:09:00.000Z

Unha marabillosa sorpresa. Quen lle ía dicir a Sabela que o libro que lle faltaba llo ía vir entregar Leo en persoa durante a clase de educación física?. E cunha marabillosa dedicatoria en forma de haiku. Os outros gañadores: Basilio, Alicia e Belén tamén recibiron a visita de Leo. Moitas grazas, Leo! Velaquí algunhas fotos do encontro inesperado.

Néboa escura, claro o sentimento

2010-05-30T19:17:00.003Z

Sabela Vilar Estévez, de 3º ESO A, que presentou o poemario Néboa escura, claro o sentimento, baixo o pseudónimo de Chocolata, foi a gañadora do 2º premio, correspondente ao IES Auga da Laxe, do 1º Concurso de Haikus do Val Miñor que organizaron conxuntamente os ENDL e os departamentos de Lingua Galega do IES Auga da Laxe, IES Escolas Proval, IES Terra de Turonio e IES Val Miñor. No Auga da Laxe houbo dez poemarios que foron seleccionados como finalistas. Co poemario de Sabela comezamos a publicación deses dez poemarios. Nos próximos días iremos poñendo outros. Velaquí o poemario e unha foto da gañadora.

Néboa escura, claro o sentimento

Vermella e negra
a septempunctata
Voa xoaniña
Nauja verán
sol no atardecer
libre veleiro
Os ollos doces
Meixelas estreladas
Noite de verán
Á espreita
o lobo solitario
Lúa chea
Noite estrelada
Solitario camiñar
Serra da Groba

Noelia é Sandra

2010-05-30T18:47:00.002Z

Coa repetición desta foto de Marta e Sandra lendo haikus queremos corrixir o erro que tivemos na serie de fotos da semana pasada cando confundimos a Sandra con Noelia. Mil perdóns, Sandra!

As mil cousas da semana pasada

2010-05-25T18:56:00.001Z

P.I.LIN.G. Illas Cíes

2010-05-24T17:32:00.000Z

97 persoas entre pais, nais, profesorado e alumnado de distintos niveis, celebraron onte un p.i.lin.g.(percorrido de inmersión lingüística en galego) no incomparable marco das Illas Cíes. Tres roteiros ao Monte do Faro, á Pedra da Campá e ao Faro da Porta, dividiron pola mañá o grupo en tres. Logo do xantar, algúns e algunhas preferiron a praia mentres uns cantos acompañados por unha guía do parque fixeron outra camiñada. Velaquí a foto dun dos grupos na Pedra da Campá.

Entrega de premios do Concurso de Haikus

2010-05-21T17:15:00.000Z

Divertido e marabilloso acto de entrega de premios do 1º Concurso de Haikus do Val Miñor para alumnado de 2º ciclo de secundaria. Nesta 1ª edición participaron alumnos e alumnas de catro centros: IES Auga da Laxe, IES Escolas Proval, IES Terra de Turonio e IES Val Miñor. En total, presentáronse arredor de 130 poemarios. A gañadora do 1º premio foi Patricia Molinos do IES Val Miñor. Sabela Vilar Estévez, de 3º ESO A, gañou o premio ao mellor poemario do Auga da Laxe. Basilio Pazos, Alicia Grandío e Belén Sobrado, de 3ºPDC, recibiron mencións honoríficas por haikus individuais. No acto contamos coa presenza de Leo que nos regalou estupendas cancións cheas de humor e cargadas de intención. Velaquí unhas fotos.

Entrega das herbas de namorar

2010-05-19T17:06:00.000Z

Onte, mércores, tivo lugar a entrega de case un cento de herbas de namorar. Simbolizan o compromiso de moitas e moitos de vós coa lingua e coa terra. Aquí vos deixamos unha foto de anticipo.

Xa somos case cincuenta!

2010-05-07T20:06:00.003Z

Abraiado, feliz e desbordado está o equipo Balbordo con tanta herba namorada. Mil grazas a todos e todas: Gabriela, Agustina, Natalia, Irene, Ángela, Lucas, Noelia, Tamara, Sabrina, Jéssica, Mª Jesús, Juan, Carmen, Antonio, Iván, María, Claudia, Patricia, Pablo, Samanta, Ángela, Helena, María, Paula, Álex, Sara, Nerea, Conchita, Chus, Rosa, Alexandra, Raquel, Sabela, Eva, María, Xiana, Clara, Nerea, Gabriel, Irene, Cinthia, Antía, Cristina, Miguel, Agustín, Ramón, Anxo...A ver se chegamos a cen!

Concurso de haikus

2010-05-06T20:25:00.002Z

Finalizou o prazo para presentar orixinais ao 1º Concurso de Haikus do Val Miñor que organizan conxuntamente os equipos de normalización e os departamentos de lingua galega do IES Terra de Turonio, IES Val Miñor, IES Escolas Proval e IES Auga da Laxe. Agora é o momento dos nervios, das deliberacións e da espera impaciente. O veredicto do xurado constituído por profesorado dos catro institutos coñecerase o próximo 21 de maio no transcurso dun acto que se celebrará no Auditorio de Gondomar e que contará coa actuación estelar de Leo.

P.I.LIN.G. Illas Cíes

2010-05-05T19:34:00.005Z

Si, estamos que non paramos. O próximo 23 de maio, domingo, imos facer un p.i.lin.g. moi especial: As Illas Cíes agardan por nós. Un marabilloso percorrido en galego polos sendeiros dos faros, un pouco de sol na praia máis fermosa do mundo, un xantar delicioso, un concurso con grandes premios... Non nos digas que aínda non estás na lista!. Se queres vir, apúntate en conserxería. Tes de prazo até o 18 de maio. Está invitada toda a comunidade escolar(pais, nais, profes, alumnado...). A que esperas?

Tuneando zapatillas en galego

2010-05-03T19:27:00.002Z

Si, mil cousas están a pasar no Auga da Laxe. Cóntovos a última: os alumnos e alumnas de 3º e 4º ESO están tuneando zapatillas en galego. Preguntarédesvos como se fai iso. Pois é moi sinxelo: unhas zapatillas de tea de distintas cores, unhas pinturas, unha idea arredor do galego, un moito de axuda da profesora de plástica e, no futuro, un deseño exclusivo, único e marabilloso para cada un e cada unha. Seguirémosvos informando...

Unha herba e unha lingua

2010-05-02T19:21:00.002Z

O ENDL Balbordo regálache unha herba de namorar. Por que? Por moitas razóns: porque é unha planta fermosísima, autóctona, en perigo de extinción, cunha lenda engaiolante...Que non coñeces a lenda?. Pois achégate polo taboleiro de normalización e infórmate. E que tes que facer ti a cambio?. Pois namorarte da herba e da túa lingua, anímaste?

En galego, mil cousas poden pasar...

2010-04-26T19:05:00.001Z

O título do último premio Merlín, Mil cousas poden pasar, de Jacobo Fernández, é o lema escollido para presentar a morea de actividades que arredor do Día das Letras vai organizar o equipo de normalización do instituto. Si, en galego, mil cousas poden pasar: un contacontos de Cándido Pazó, un gran concurso de haikus, unha actuación de Leo, un p.i.lin.g. nas Illas Cíes, unha exposición de zapatillas tuneadas, unha herba de namorar, un compromiso...Estade atentos e atentas. Abride as fiestras da vosa lingua e non teñades medo.

Galicola, sabor para a túa lingua

2009-11-01T19:08:00.003Z

Moi boa a idea que a Asociación Cultural Fontaira acaba de poñer en marcha: unha bebida de cola galega. Coa colaboración dunha empresa de Vilagarcía e, sen dar a coñecer a fórmula máxica do líquido, lanzou ao mercado 5000 botellas de 33cl como a da foto. De momento, xa hai 60 bares de toda Galicia que a teñen na súa carta. Parece que o sitio máis cercano para nós é Porriño. Parabéns pola iniciativa e longa vida á Galicola! Para máis información, velaquí tedes a súa web.

O marcapáxinas de María...

2009-06-29T17:07:00.005Z

O ENDL Balbordo, en colaboración con Plástica, convocou unha proposta para elaborar un marcapáxinas identificativo do equipo. A idea debía estar relacionada coa lingua e ser orixinal. Despois de duras deliberacións, decidimos que Converse en galego. Camiña co galego. era a que máis nos gustaba. A gañadora foi María Reigosa, de 1º ESO. Xa temos os marcas no insti. Se queredes algún, só tedes que pedilo. Velaquí vos deixamos o deseño. Orixinal, non si?

E a camiseta de Ana...

2009-06-29T13:32:00.001Z

Non forma parte da serie de imaxes sobre camisetas en galego que puxemos hai un tempo, pero é, probablemente, unha das máis orixinais e fermosas. Seguro que calquera dos deseñadores de camisetas se pelexarían porque formase parte da súa colección. É obra de Ana Moliner, de 1º de Bacharelato. Velaquí a tedes. Que opinades?

Déixate mollar.

2009-06-24T07:42:00.003Z

Aquí vai o outro anuncio. Molládevos, molládevos!.

Abre a fiestra. Non teñas medo.

2009-06-23T07:25:00.002Z

Velaquí o primeiro dos anuncios realizados polo ENDL con alumnado de todos os niveis. Moitas grazas a todos eles e elas pola súa colaboración. Xa sabedes, as linguas suman. E en galego tamén estamos no mundo.

As linguas suman. Campaña da Coordinadora Galega de ENDL

2009-06-09T14:13:00.005Z

Cremos interesante reproducir aquí o tríptico que a CGENDL elaborou sobre a importancia das linguas. Un documento para a reflexión. Se queres coñecelo, preme aquí.

A chuvia nunca volve cara arriba

2009-06-08T17:29:00.002Z

Foi unha historia que comezou cunha canción de Pedro Guerra. O profe de educación física preparou unha coreografía co alumnado de 1º ESO. E logo, Chus, a de plástica, completou o movemento, o baile e o ritmo co vestiario (ou sexa, máis camisetas). Estas son as que fixo o alumnado de 1º ESO. Bonitas tamén, non si?.

Outros blogs de ENDL (2)

2009-06-07T17:12:00.003Z

AS GABARRAS

O IES de Breamo ten un marabilloso caderno de bitácora: AS GABARRAS. O nome fai referencia a unhas pequenas embarcacións, de fondo xato e construción sólida, que se usan para carga e descarga nos portos e para transporte de mercadorías pola costa. E tamén, dunha maneira simbólica, nos fala da necesidade de levar a lingua por todos os recunchos, compartíndoa, vivíndoa, amándoa...Por certo, grazas amigos e amigas de Breamo, por facernos presentes no voso sitio.

Obradoiro de camisetas en galego

2009-06-04T19:44:00.003Z

Velaquí unha pequena mostra das camisetas elaboradas no obradoiro de camisetas en galego feito no instituto. Moitas grazas a Chus, do departamento de plástica, pola colaboración. Están bonitas, a que si?

Encontro Sant Just-Auga da Laxe en Santiago

2009-05-16T19:16:00.000Z

Organizado polo ENDL Balbordo tivemos onte o encontro co alumnado catalán do IES Sant Just que está estudando galego como optativa. Un grupo de alumnos e alumnas do Auga da Laxe estiveron intercambiando correos en galego ao longo do ano como unha experiencia de aprendizaxe e convivencia. O lugar escollido para encontrarnos foi a marabillosa cidade de Santiago. Houbo tempo para todo: recibimento institucional na Xunta, visita aos tellados da Catedral, xantar, paseo polo Casco Vello,...e novas amizades catalanas que falan galego. Velaí unhas fotos que deixan constancia do momento.

Marabillosa noite de P.I.LIN.G.

2009-05-01T22:23:00.002Z

Non hai imaxes. Había que estar alí para poder contalo (e son oitenta as e os privilexiados). O certo é que, a pesar dos nove graos de temperatura, quedamos marabillados con Saturno, cos cráteres da Lúa, con Xéminis,...Moitas grazas aos e as compoñentes da agrupación astronómica Rías Baixas por unha noite tan especial no monte Alba. Prometemos repetir!

P.I.L.I.N.G. das estrelas

2009-04-26T19:22:00.003Z

Este próximo xoves día 30 pola noite, se o tempo o permite, imos facer un P.I.L.I.N.G. diferente: imos ver as estrelas. Para tal ocasión, contaremos coa presenza de varios dos integrantes da agrupación astronómica Rías Baixas que ás 8 da tarde no salón de actos do insti nos explicarán unhas cantas cousas para podermos gozar mellor da observación. Logo, ás 10 da noite, partiremos todos e todas cara ao Monte Alba onde cuns telescopios de gran alcance imos poder ver a lúa, a constelación de Orión e uns cantos planetas. Se queredes vir, só tedes que apuntarvos na conserxería do insti. Estade atentos a un posible aprazamento por mor do mal tempo (nese caso tentariamos facela o 15 de maio, venres). Agardámosvos!

Planeta de ENDL

2009-03-14T16:59:00.003Z

Presentámosvos unha nova e excelente idea: unha páxina que se actualiza constantemente volcando nun mesmo espazo artigos de bitácoras e webs de todos os ENDL de centros escolares galegos e engadindo sitios con novas relacionadas coa lingua. Parabéns ao CPI Aurelio M. Rei García de Cuntis pola iniciativa. Por certo, nós tamén formamos parte deste planeta. Se queres coñecelo, preme aquí.

Os dous amigos

2009-03-01T11:38:00.003Z

Roger de Flor pode ser unha das sensacións deste ano. Nesta canción cóntanos a historia real de Luis Maquieira, poeta e artesán, e do trobador coñecido como o Marqués de Viñas. Colaboran no vídeo María e Carolina de Faltriqueira. Recomendable tamén a súa canción Cogumelos. Mágoa que non teña moito máis repertorio en galego.

Carta á Serra da Groba

2009-02-23T09:51:00.002Z

Baiona de Miñor, 14 de febreiro 09.-
Querida Groba:
Escríboche nestas follas de pasta de papel de “arcolito” galego para dicirche que no sábado, este mesmo, hoxe, fomos nenas, nenos, meniños, meniñas, mociños, mociñas, mestras, mestres, pais, nais e toda raza que quixo vir connosco botarlle unha ollada ás túas terras arboradas e ardidas.
Témosche que dar as grazas polo moito que nos deches na mañá e na tarde sabatina. Ademais Miguel, Nerea, Duna, Sara, Dani e o mozo Xilberte explicáronnos as pegadas das mulleres e homes que pasaron, suaron, lidaron, plantaron, colleitaron, gravaron, enterraron, pariron, choraron, cazaron lobos, montaron burras, asaron sardiñas, asexaron piratas no horizonte, prenderon fogueiras nos fachos, beberon augas nas fontes, regueiras e ulleiros.
Estivemos no teito, no nacemento da Regueira dos Lavazidos, debaixo do Alto da Lebre, pé do Montouto preto da Poza Negra nai da Regueira Escura, contribuínte do Río da Groba.
Estivemos no embigo do mundo, na Cruz de Pau onde se xuntan os homes das aldeas das burras da Groba, onde corisca, pasa o lobo da terra para o mar, onde soterraron hai 6000 anos, onde caprichosa a serra verte augas ó Atlántico, á Baía de Baiona, ó pai Miño.
Estivemos na laxe gravada, na laxe escrita, na Laxe Cruzada onde os máis pequerrechos escribían, calcaran a mellor arte gravada do mundo.
E logo O Foxo Pedriño explicado en Galicia, bilingüe en galego e valencià, foron Duna e os llops.
E logo fomos cara A Beirada da Groba por onde baixan A Regueira do Niño do Corvo que nace da Fonte Salgueiro, e da Regueiriña de Entre as Chans e da Regueira da Boca da Groba que se funden na Cara Batallada fervedura de augas.
Xa trepáramos no poema da poesía, trepáramos pola beira da Meniña das Chans, Traspadornelo, A Regueiriña do Valo, no Peito do Meixón Verde, na Regueira das Taramelas, no Campo das Mozas, no Campo de Poxeiros.
Trepamos no verso toponímico.
Trepamos no pé das Malladiñas,
por baixo da Cal, da Fonte do
Corisco, no Campo da Florinda
ou da Balbina e ollamos de
lonxe A Burgueira Vella.

Xosé Lois Vilar

Groba: álbum de fotos

2009-02-15T17:13:00.001Z

P.I.LIN.G. na Groba

2009-02-14T19:59:00.000Z

Despois de varios intentos, por fin puidemos celebrar o primeiro P.I.LIN.G. do curso. Un día marabilloso acompañounos pola Serra da Groba onde visitamos mámoas, petróglifos e un foxo do lobo. Máis de cincuenta persoas entre pais, nais, alumnado, profesorado e outra xente interesada en coñecer a riqueza paisaxística, arqueolóxica, etnográfica e natural, xuntámonos ás dez da mañá no instituto para emprender camiño e compartir unha xornada de natureza e lingua. Contamos, ademais, coas explicacións de Xosé Lois Vilar e Xilberte Manso, membros do Instituto de Estudos Miñoranos, e de Duna, Nerea, Sara, Miguel e Dani, rapaces e rapazas de 1º e 2º de ESO. En fin, un verdadeiro luxo. Aí vos queda a foto de familia.

P.I.LIN.G. versión 2.0

2009-02-06T20:24:00.004Z

Aí vai unha nova versión de cartel un pouco máis traballada. Parece que despois do temporal que agardamos para o luns, o tempo vai ir a mellor. Podemos soñar cun bo día para o próximo sábado día 14. Agardámosvos!

P.I.LIN.G. na Serra da Groba

2009-02-05T19:30:00.002Z

Finalmente e despois de consultar os mapas metereolóxicos unha chea de veces, parece que imos ter unha tregua a mediados da semana que vén. Con todo o arriscado que pode parecer vistos o vento, a chuvia e o pedrisco destes últimos días, imos facer o P.I.LIN.G. o próximo sábado día 14 de febreiro. Haberá autobús gratuíto e xantaremos en Chan da Lagoa. Apuntádevos en conserxería e, se sodes alumnado, pedide unha autorización para traela asinada de casa. Polo demais, agardámosvos para gozar dunha xornada especial falando en galego nun lugar marabilloso.

O primeiro trimestre de 1º da ESO

2009-01-20T18:01:00.001Z

No primeiro trimestre do curso, o alumnado de 1º ESO vimos dúas películas: unha muda, no instituto, e outra, en Baiona, que se chamaba Los seis signos de la luz. Tamén fixemos unha pancarta o 25 de novembro, Día da Violencia de Xénero, para berrar ben forte que o que nos gustan son os bos tratos. Cada un de nós fixemos un autorretrato e logo os xuntamos e puxemos en letras ben grandes: 25-N Día dos bos tratos. En decembro, fomos ao Marco, en Vigo, e vimos unha exposición de arte e maxia. Finalmente, elaboramos un traballo para relixión relacionado co Día da Declaración Universal dos Dereitos Humanos.

Enviado por Bruno (1º ESO)

Preparando o P.I.LIN.G.(2)

2009-01-12T16:00:00.005Z

Na xornada de preparación do PILING do próximo 7 de febreiro, tivemos tempo de aprender moitas cousas e incluso de xogar. Así, a propósito do descubrimento arqueolóxico duns muíños naviculares, aconteceu o seguinte: Xosé Lois contoulle a nova a un alumno/a e este a outro/a e así sucesivamente...Queredes saber o resultado final? Velaquí o tedes.

1º) Xosé Lois a Alumno/a 1: "Son muíños naviculares de soporte fixo nos que se moían cereais e parece que tamén sustancias psicotrópicas: droga. Hainos entre Caminha e Cangas, no Morrazo, con dúas excepcións en Carnota e A Golada. Teñen uns 6000 anos..."

2º) Alumno/a 1 a Alumno/a 2: "Son uns muíños que servían para moer cereais e cilicotina que era unha especie de droga e foron feitos hai 6000 anos..."

3º) Alumno/a 2 a Alumno/a 3: "Un muíño navicular é onde se moía o cereal e unha especie de droga que estaba no Morrazo en Cangas..."

4º) Alumno/a 3 a Alumno/a 4: "Os muíños naviculares moen millo e unha droga que se chama...algo que acaba en tina e que se dá en Cangas do Morrazo..."

5º) Alumno/a 4 a Alumno/a 5: "O muíño verdicular sirve para recoller droga que se chama optimus..."

6º) Alumno/a 5 a Alumno/a 6: "O muíño verdicular pode moer trigo e millo e é como unha droga..."

7º) Alumno/a 6 a Alumno/a 7: "Un muíño verdicular pode moer trigo e millo e é como unha droga..."

8º) Alumno/a 7 a Alumno/a 8: "O muíño nervicular pode moer trigo e millo e pode quedar como unha droga..."

9º) Alumno/a 8 a Alumno/a 9: "O muíño verde é como un colar que se o tomas é como unha droga..."

Curioso, verdade?

Preparando o P.I.LIN.G.(1)

2009-01-10T21:33:00.004Z

Este sábado estivemos preparando o P.I.LIN.G. á Serra da Groba do próximo 7 de febreiro. Para iso, un grupo de alumnos e alumnas de 1º e 2º ESO estiveron toda a mañá aprendendo un feixe de cousas sobre mámoas, foxos, petroglifos, curros, toponimia,...Eles e elas serán os e as guías da saída por esta marabillosa Serra ameazada pola instalación dun parque eólico. Contamos para a ocasión coa excepcional axuda de dous membros do Instituto de Estudos Miñoranos: Xosé Lois Vilar e Xilberte. Ide reservando a data pois poremos autobuses e ao remate faremos un xantar en Chan da Lagoa (todo iso se a climatoloxía non nos é adversa). Como constancia do traballo, aí van algunhas fotos...

Intercambio con Sant Just Desvern

2009-01-09T21:27:00.000Z

Velaquí a foto do alumnado do instituto que está a realizar o intercambio lingüístico en galego con estudantes de 2º ESO da optativa de galego do IES Sant Just Desvern. Eles e elas son: Victoria, Marta, Cris, Andrea, Álex, Sheila, Noelia, Arián e Marina. Moita sorte e xa contaredes¡

Agasallos en galego

2008-12-17T19:43:00.002Z

Os e as estudantes do CPI Vicente Otero Valcárcel de Carral (A Coruña) elaboraron un interesante catálogo de posibles agasallos en galego para estas festas. Velaquí o tedes por se vos pode ser de utilidade.

O P.I.LIN.G., novamente suspendido

2008-12-14T19:51:00.000Z

Parece que este ano non estamos de sorte co tempo. O pasado sábado tivemos un día de chuvia, vento e frío que fixo imposible a celebración do anunciado P.I.LIN.G. Esperemos que no 2º trimestre si poidamos facer a camiñada pola Groba que agardamos con tanto entusiasmo. Será, se a metereoloxía non é adversa, o 7 de febreiro.

O P.I.LIN.G. aprazado, o 13 de decembro

2008-12-01T19:35:00.004Z

O P.I.LIN.G. a Chan do Cereixo aprazado o pasado día 8 de novembro por mor do mal tempo, imos tentar celebralo o 13 de decembro, sábado, xusto antes das vacacións e unha vez rematados os exames. A ver se para esta temos un pouco máis de sorte!

Feito en Cataluña, presentado en Galiza

2008-11-26T20:10:00.004Z

Mañá xoves, contra as oito da tarde, preséntase a nova edición de Vencello na Libraría Couceiro de Santiago. Este libro de texto constitúe o material básico de traballo para o alumnado dos centros de ensino secundario de Cataluña que, dentro do currículum oficial, escollen galego como asignatura optativa. ¿Cando terá o alumnado galego a posibilidade de estudar catalán?.

25 de novembro

2008-11-25T00:03:00.002Z

No Día Internacional Contra a Violencia de Xénero, no IES Auga da Laxe todos e todas queremos dar a cara polos bos tratos. E deixamos aquí unha mostra do traballo de concienciación feito polo alumnado.

Cinensino en Baiona

2008-11-24T16:14:00.003Z

Bruno(1º ESO B) envíanos esta foto sobre a actividade que 1º ciclo tivo esta mañá no Auditorio de Baiona. A película proxectada foi Os seis signos da luz. Gustoulles moito.

Intercambio galego-catalán

2008-11-19T19:42:00.004Z

O IES Sant Just Desvern é un dos institutos cataláns que ofrecen a posibilidade de aprender galego ao seu alumnado . O ano pasado, o noso insti participou con eles e elas nun intercambio galego-catalán que resultou do máis interesante. Este ano, doutra maneira, queremos seguir en contacto. E como necesitan mellorar o seu galego, nada máis axeitado que unha actividade de intercambio vía correo. Apetécevos participar?. En principio, buscamos alumnos e alumnas de 2º ESO que queiran compartir en galego con mozos e mozas do IES Sant Just. Máis adiante, xa veremos se se pode ampliar. Se ti estás interesado/a ou queres máis información, fala coa túa profe de galego ou con Anxo, Pepe ou Lidia (Balbordo) para saber que é o que tes que facer. Prazas limitadas!.

Vivamos como galegos (2)

2008-11-13T19:31:00.005Z

Aquí temos o novo anuncio da campaña.

O sábado, P.I.LIN.G.

2008-11-05T18:42:00.003Z

¿Aínda non probaches un P.I.LIN.G.?. Este sábado, se o tempo o permite, imos darche unha nova oportunidade. Temos preparada unha marcha até Chan do Cereixo. Polo camiño, imos recoller cogomelos e ao chegar imos ter un pouquiño de arqueoloxía. Lémbrate de levar o xantar, roupa e zapatos cómodos e moitas gañas de falar. Agardámoste contra as dez da mañá no insti!

A foto novamente é de Juan C.

Visitando outros blogs de ENDL(1)

2008-11-04T19:44:00.002Z

Abrimos unha nova ventá. Por ela pasarán blogs de ENDL doutros institutos e colexios. Comezamos coa Tabarra dixital do IES da Pobra do Caramiñal.

Arte

2008-10-30T09:14:00.004Z

Este é o título da obra de Yasmina Reza que vai ser representada pola compañía Fulano, Mengano e Citano o próximo 15 de novembro no Auditorio de Gondomar. ¿Queredes unha entrada para poder asistir?. Xa sabedes que a Lingua é teatro. Por iso, imos sortear invitacións entre todos aqueles membros da Comunidade Escolar que deixen un comentario nesta nova. Podedes recomendar algunha obra de teatro que vistes ultimamente ou simplemente dicir que queredes participar no sorteo. Iso si, deixade algún dato que nos permita contactar con vós. Tedes de prazo até o 12 de novembro. ¡Sorte!

As Galácticas de Gondomar

2008-10-26T20:29:00.003Z

A quen lle importa o Barça de Messi? Para que tanto rebumbio coa Liga dos galácticos?. As verdadeiras estrelas están aquí en Gondomar. Só tedes que acudir os domingos pola mañá ás Cercas para gozar co mellor fútbol: fantásticas xogadas e goles de encaixe. Non importa cal sexa o resultado. O marabilloso é ver un grupo de amigas (moitas delas alumnas do insti) sufrir, loitar, defender, atacar,...Un auténtico luxo ao alcance de todos os petos. Non volo perdades!

Mostra de Teatro de Gondomar

2008-10-25T11:59:00.006Z

Comeza esta fin de semana a Mostra de Teatro de Gondomar. Este sábado contra as 22.30h no Auditorio Lois Tobío, poderemos asistir á obra A bombilla máxica, de Woody Allen, que será representada pola compañía Teatro do Atlántico.

Agustín Fernández Paz, Premio Nacional de Literatura Infantil e Xuvenil 2008

2008-10-24T19:31:00.005Z

O ENDL do IES Auga da Laxe quere felicitar a Agustín por este tan agardado e merecido premio.

As nosas palabras, os nosos mundos

2008-10-23T08:48:00.007Z

Esta exposición itinerante sobre a lingua galega na diversidade lingüística pode ser visitada do 24 de outubro ao 7 de novembro na Estación Marítima de Vigo.

72 aniversario da volta dos 9

2008-10-18T16:22:00.003Z

Hoxe ás 12:00 da mañá comezaba o acto en memoria dos 9 represaliados o 15 de outubro de 1936. No acto os familiares dos asesinados facían unha ofrenda floral promovida polo colectivo volta dos nove. O monumento, na foto, é obra do escultor Fernando Casás.

El pop gallec protagonitza l´Enderrock d´octubre

2008-10-18T09:53:00.006Z

El CD i monogràfic Gz Pop! és un repàs als grups i artistes referencials de l'escena actual de la música gallega que s'encarta amb la revista catalana Enderrock del mes d'octubre.El disc inclou 18 artistes i els grups què surtin en aquest recopilatori mostren la vitalitat, emergència i qualitat de les propostes musicals que han sorgit a Galícia durant els últims temps. Del funk rock de Loretta Martin a la fusió de Lamatumbá, del hip hop de Dios Ke Te Crew al rock sense concesions de Zënzar, del pop electrònic de Projecto Mourente al pop tecno-orgànic de Fanny + Alexander, entre d’altres.

Festival Europeo da Canción para Linguas Minorizadas

2008-10-11T15:25:00.004Z

Planeta 19 é o título da canción coa que Boy Elliot and the plastic bags representa a Galiza na quinta edición deste Festival. Será o próximo sábado 18 de outubro en Lulea (Laponia). Velaquí a tedes.

1º P.I.LIN.G.

2008-10-09T18:11:00.004Z

Será o vindeiro 8 de novembro. Estaremos aquí. Bonito, verdade?. Pois ide reservando esta data na vosa axenda. A foto é de Juan Chamorro.

Talasonimia da costa sur de Galicia

2008-10-06T18:23:00.000Z

Velaquí temos un libro excepcional. Unha marabillosa mostra de amor á terra. Un traballo de recollida minucioso, exhaustivo e paixonal. Para non perdelo.

Balbordo busca xornalistas

2008-10-03T18:25:00.000Z

O novo curso xa está aquí. E con el, unha nova resurrección deste blog (a ver se desta vai a vencida e vive feliz por moito tempo). Pronto ides ter máis información sobre todas as cousas que estamos a argallar. Iso si, para que esta ventá de comunicación virtual siga aberta vanse necesitar moitos e moitas xornalistas, moitas mans, moitas ideas...Así que se queredes formar parte do equipo de redacción de Balbordo, estamos a agardarvos cos brazos abertos. Sede benvidos e benvidas!

Suspendidos o 2º e o 3º P.I.LIN.G.

2008-02-08T19:43:00.000Z

Balbordo comunica que suspende todas as actividades previstas ata final de curso, entre elas os dous P.I.LIN.G.s pendentes á Serra da Groba e a Vilanova dos Infantes. O motivo non é outro que a exclusión do proxecto de normalización do Centro das axudas que concede todos os anos a Secretaría Xeral de Política Lingüística por ter chegado fóra de prazo (o prazo remataba o día 13 de decembro e ese mesmo día mandouse o proxecto por carta certificada desde Gondomar pero algo debimos facer mal porque non estamos admitidos a trámite). Á espera de máis protestas que non van ir a ningures, simplemente pedir perdón pola case total paralización de actividades de aquí a final de curso (o presuposto a fondo perdido xa está máis que superado coas actividades feitas ata o momento). Mantense, en principio, o obradoiro de risoterapia do mes de abril pois é un compromiso adquirido hai xa bastante tempo coa persoa que virá a dalo. Polo demais, reiterar mil perdóns a quen poida afectar... e ata outra!

Antroido Auga da Laxe 2008

2008-02-05T19:05:00.000Z

Ti recibes o que dás

2008-02-03T12:38:00.000Z

Como anticipo da quincena do Ano Internacional da Terra que comezará no instituto o día 11 de febreiro con exposicións, saídas, club de lectura, charlas,...aquí tedes un vídeo duns e dunhas que fan moito todos os días para que este planeta no que vivimos non sexa moito peor do que xa é. Sen palabras.

A festa non vai parar

2008-02-02T12:16:00.000Z

A festa non vai parar é a primeira canción dance en galego obra do Dj SON1C da discoteca Tattoo e interpretada pola cantante Isis. A bailar!!!
Un, dous, tres, catro Oh oh oh (X2) oh. Eu quero bailar,non podo esperar.O meu corpo está listo para amar. Sinto a paixón do teu corazón. Voute bicar neste subidón.A festa non vai parar. Contigo quero xogar. Esta noite voarei,co son dance do meu DJ.A festa non vai parar. Teño gañas de gozar.Esta noite voarei.¡Quero dance: Pono, DJ!Oh oh oh (X2)Na nana na nana na. A festa non vai parar. Na nana nana, Ohhhhh Na nana na nana na. A festa non vai parar. Na nana nana. Ohhhhh. A festa non vai parar. Contigo quero xogar. Esta noite voarei,co son dance do meu DJ. A festa non vai parar.Teño gañas de gozar.Esta noite voarei.¡Quero dance: Pono, DJ!Oh oh oh (X3). A festa non vai parar¡Non, non, non!¡Non vai parar!

Linguas cruzadas (4)

2008-01-29T19:10:00.000Z

Por se aínda non o viches, aquí tes o documental

Linguas cruzadas (3)

2008-01-28T19:43:00.000Z

O luns 21 tivo lugar a proxección do documental “Linguas Cruzadas” para o alumnado de 2º de bacharelato. O documental, persoalmente, pareceume bastante interesante, e ata me aventurarei a dicir que menos xente da esperada se aburriu durante a súa proxección. Contamos coa presenza dunha das autoras, María Yáñez, coa que mantivemos unha charla tras ver a súa obra.
A charla, como cabía esperar, comezou co silencio de sempre por parte do alumnado, co que María se viu obrigada a falar primeiro. Contounos que evitara entrevistar persoas relacionadas de forma profesional coa lingua porque o que lle interesaba era o que pensaba e falaba a xente de a pé, por dicilo dalgunha forma. Logo, co propósito de animarnos a falar, preguntounos que era o que nos chamara a atención do documental. Por suposto, a resposta foi o silencio. Vendo a situación, Concha viuse obrigada a interceder por nós e comentou unha interesante reflexión que puxera un dos seus alumnos nun traballo: dicía que todas esas persoas que falan castelán e consideran o tema da lingua galega moi importante son uns hipócritas. ¿Crédelo vós así? Hai moitas persoas, reflectidas no documental, que afirmaban que a perda do galego é algo que se debería evitar, que se debería facer máis por el. Incluso unha delas, nas súas diatribas, chegou a afirmar que o que non fala galego non ten identidade. Iso si, todas esas persoas deixaron moi claro que non falaban galego e que non tiñan pensado empezar nun futuro. ¿De verdade son uns hipócritas? Isto animou un pouco o coloquio, chegando a formulárense preguntas como: “¿É verdade que hai máis mozos ca mozas que falan galego?” ou “¿É peor visto que unha moza fale galego porque nela queda peor o falar “montuno” ca nun mozo?” O tema comezou a pórse interesante, pero as preguntas comprometidas non encontraron resposta porque, como sempre acontece nestes casos, nos salvou a campá. Animo os que quedaron coa palabra na boca ese día a que expresen as súas opinións aquí. ¡E que non teñan medo de dicir o que pensan, que non imos acusar a ninguén de hipócrita!

Erea Fabeiro (2º Bach.A)

Linguas cruzadas (2)

2008-01-27T19:38:00.000Z

Linguas cruzadas no IES Auga da Laxe (Gondomar)
21 de xaneiro de 2008

Algunhas opinións dos alumnos e alumnas de 2º Bach...

A min gustoume moito o documental. Eu son unha rapaza que sempre falou galego e estivo ben ver as opinións doutros rapaces da miña idade. Sorprendeume moito a muller coreana que quería aprender galego, pareceume fantástico. Opino o mesmo que algúns rapaces cando dicían que se escoita falar en galego máis aos rapaces que ás rapazas. A verdade é que coñezo moi poucas rapazas que falen galego.

O certo é que a reportaxe me pareceu moi interesante xa que os protagonistas eran xente normal e corrente, sen ningún título. Eu sentinme identificado co grupo dos neofalantes, aínda que xa falo galego desde hai anos.

O documental pareceume moi interesante.Eu son castelán-falante maioritariamente, pero gustaríame falar galego, ser neofalante, aínda que me resulta moi difícil.

Gustoume o documental porque non é o típico no que se mostran datos senón que se reflicte a realidade a través de testemuños reais.

Ver Linguas cruzadas foi unha moi boa experiencia para min. Nunca tiven ningún tipo de prexuízo cara ao galego, todo o contrario, pero ao ver este documental puiden coñecer as opinións doutra xente nova coma min.

Unha das cousas máis interesantes do documental foi que se desen a coñecer grupos musicais en galego. Eu, que escoito moita música, nunca oíra falar de ningún deles e iso non debería ser así porque me pareceron moi bos.

O que máis me gustou do vídeo foi a parte que tiña que ver co ámbito musical xa que a min me gusta moito a música e non coñezo grupos importantes que canten en galego.

Eu identifiqueime co grupo dos rapaces que foron educados en castelán e agora comezan a falar galego, cos que cambian de lingua segundo con quen falen, porque eu intento falar galego cando me falan en galego.

O documental pareceume moi interesante. Eu son castelán-falante e gustaríame empezar a falar galego, pero non encontro ámbitos onde facelo porque na miña casa comigo e co meu irmán falan en castelán e os meus amigos falan en castelán...

Gustoume moito o documental, o malo é que pasou moi rápido.

O documental gustoume, pareceume ben que a xente opinara sobre a súa lingua. Eu identifíqueime coas rapazas que estaban no botellón porque eu falo castelán sempre, pero gustaríame falar galego, por que non?

Sentinme identificada con algunhas persoas que dicían que os seus pais era galego-falantes pero que a eles os educaran en castelán. Ese é o meu caso e, aínda que agora son consciente da conflitividade das dúas linguas e podería falar o galego na casa, o certo é que me custa manter unha conversa natural e fluída nesta lingua.

O que máis me chamou a atención foron os comentarios que fixeron dúas mulleres de que lles prohibían falar galego no traballo. Paréceme incrible que a estas alturas aínda pasen cousas así, eu cría que este tipo de situacións estaban totalmente desaparecidas.

O documental gustoume moito, pareceume moi realista. Sentinme moi identificada coas dúas mozas que dicían que no traballo non lles permitían falar galego. O verán pasado traballei de camareira e a nosa xefa cos clientes non nos permitía falar en galego porque dicía que era unha cuestión de educación.

Gustoume especialmente que se mostrase que hai xente de fóra, como unha moza coreana por exemplo, que aprende a falar galego e que mostra un interese pola nosa lingua que ás veces nós non mostramos.

O documental gustoume moito, sobre todo porque opina a xente nova, que é de quen en realidade depende o futuro do idioma. Eu son castelán-falante e, aínda que me gustaría falar galego, non o fago. Podo ter así unha actitude hipócrita, pero a verdade é que non son quen de poñerme a falalo. Quizais este documental me fixera recapacitar para intentalo, creo que debería poñerse noutros centros educativos, a ver se reflxionamos un pouco.

"Linguas cruzadas" foi realmente interesante. Foi unha sopresa que fose tan ameno, cun enfoque interesante e mesmo un toque de humor que fixo que até os compañeiros que habitualmente "pasan de todo" prestasen atención.

A min pareceume unha reportaxe moi interesante e entretida e creo que reflicte moi ben todos os puntos de vista que existen sobre a nosa lingua. O grupo co que me sentín máis identificada foi o dos rapaces coruñeses xa que eu falo castelán sempre, porque sempre me falaron en castelán. Con todo, valoro moito que teñamos unha lingua propia e gustaríame, de verdade, que en Galicia se falase máis o galego, pero eu polo menos non son quen nestes momentos de dar o paso de cambiar de lingua.

Eu son neofalante, como algúns dos rapaces que aparecen no documental. E debo confesar que as persoas coas que máis me custa falar galego son aquelas que falan sempre esta lingua porque creo que son as que máis notan o meu cambio lingüístico e mesmo as que máis se mofan do asunto.

Gustaríame ser algunha desas persoas que pouco a pouco foron incorporando o galego como lingua natural á súa vida cotiá.

Chega o Antroido!

2008-01-23T18:33:00.000Z

Ide preparando disfraces e máscaras que chega a Festa do Antroido ao IES Auga da Laxe!. Haberá un gran baile, unha fantástica actuación sorpresa, un concurso de máscaras e, coma outros anos, o xa tradicional concurso de disfraces de grupos (lembrade que tedes que ser un mínimo de 5 persoas) con grandes premios para os mellores e para o grupo máis numeroso. O venres 1 de febreiro a festa rachada agarda por vós!. Non podedes perdela!

Unha xoia

2008-01-20T18:15:00.000Z

A Señora Carmen é unha das compoñentes do grupo Malvela e agora, aos seus estupendos 82 anos, presenta o seu primeiro disco en solitario Na flor dos meus anos, editado por PAI Música. Nel, a Señora Carmen aparece acompañada por voces tan importantes como as de Dulce Pontes e Uxía (por certo, o seu novo disco promete) e por músicos como X. M. Budiño ou Rodrigo Romaní. Ademais, a palabra de Fran Alonso fai un marabilloso percorrido pola intensa vida desta muller. Para non perdelo!. Se queres saber máis, preme aquí.